Dy ekipet e Raiffeisen Ligës së Parë në futboll, Vushtrria e 2 Korriku, do të ndeshen të dielën në stadiumin “Ferki Aliu” me fillim nga ora 15:00, ndeshje e vlefshme për xhiron XXII-të të Raiffeisen Ligës së Parë të futbollit në Kosovë.
Tash e disa vite, shpeshherë këto ekipe kanë parë njëra-tjetrën përballë në kuadër të garave të rangut të dytë, me ekipin “vushtrrias” që ka pasur bilanc më të mirë.
Ndeshjet ndërmjet këtyre dy ekipeve gjithnjë kanë dhuruar emocione, sidomos ajo e fundit e zhvilluar gjashtë javë më parë, po në tokën “vushtrriase”, e cila përcaktoi fituesin tek në minutën e fundit të ndeshjes, kur Arbnor Musa realizoi për 1:0 në të mirë të ekipit të Vushtrrisë.
Edhe më emocionuese ishte ndeshja e parë e këtij edicioni, e zhvilluar më datë 07.10.2023 në stadiumin “2 Korriku”. Asokohe 2 Korriku nuk arrinte ta ruante dy herë epërsinë e fituar, me golat e Edon Zeçiri (22’) dhe Ardit Gashi (58’), pasiqë edhe asaj radhe Vushtrria barazonte në minutat e fundit, fillimisht në fundin e pjesës së parë me Drilon Fazliun (45’+), e më pas me Paulo Cezar (90’+).
Kështu, me dy “akte” interesante të luajtura deri tani, Vushtrria e 2 Korriku e përmbyllin “shfaqjen” për edicionin 2023/24 me duelin e të dielës, i cili i është besuar gjyqtarit mitrovicas, Erdall Zasellës, dhe asistentëve të tij, Fisnik Ramës e Lirak Ibërdemajt.
2 Korriku në këtë takim vjen me formë relativisht të mirë, pas dy fitoreve (të dyja kundër Kikës) e dy barazimeve (kundër rivalëve lokalë, Ramiz Sadikut e Flamurtarit) me gjashtë gola të shënuar dhe tre sosh të pësuar; në krahun tjetër, Vushtrria në katër përballjet e fundit ka një fitore (kundër Ulpianës), një barazim (kundër Ramiz Sadikut) e dy humbje (kundër Flamurtarit e Vjosës), duke shënuar tre gola e duke pësuar po aq.
