Klubi i Futbollit “2 Korriku” ka kënaqësinë që të njoftojë publikun se ka arritur marrëveshje me futbollistin me shumë përvojë në futbollin kosovar, Burim Qorrin.

Mesfushori 30-vjeçar rikthehet tek “verdheblutë” pas përvojave nëpër skuadra të ndryshme kosovare, me të cilat arriti që me plot meritë ta fitoj epitetin e futbollistit kampion e të vlerësohet lartë për paraqitjet dinjitoze ndër vite në futbollin vendor.

Qorri ka nisur menjëherë me stërvitje me ekipin “verdheblu”, me ç’rast edhe ka pasur mundësinë që të takohet me stafin teknik e grupin e futbollistëve të cilët i ka falënderuar për mikpritjen dhe ngrohtësinë e dhuruar në takimin e tyre të parë në klubin e ri për të.

“2 Korrikun e njoh goxha mirë. Ndihem mirë që jam këtu dhe lirisht mund të them se kam ardhur për të korrur suksese. Kam ardhur të ndihmojë me përvojën time dhe pse jo të provojë diçka të re në karrierë”, potencoi për të parën herë për 2korriku.com, mesfushori më i ri i afruar në radhët e klubit kryeqytetas.